Hafnaði næstum í Vestre Landsret í gær

Í gær fór ég á löggustöðina með 4 blöð og bað þá um að setja stimpla þau. (Dokumentation af kopiens rigtighed). Konan á löggustöðinni sagði að ég þyrfti að fara í Réttinn.

Í gær var vorið skollið á og sólin skein glatt. En samt ekkert sandalaveður. Ég fór í gallabuxur, stígvél og sveitalubbalopapeysuna mína, greip svo Kildemoes og hjólaði af stað út í Réttinn. Var svoldið fúl yfir því að þurfa að fara í Dómshúsið (Réttinn) í úthverfi Sönderborgar og hefur alltaf fundist húsið ljótt. Minntist umræðanna þegar Rétturinn var fluttur fyrir ca 2 árum síðan… úr stóra fallega Dómshúsinu á Kongevej sem byggt var upp úr þarsíðustu aldamótum í þýskum byggingarstíl af þýskum byggingarmeistara frá Flensborg. Þá hét Kongevej, Kaiser Wilhelm Allée (eða e-ð þvíumlíkt).  Við flutningin felldi fólk tár, þrátt fyrir að það hafi öllum verið ískalt í húsinu á veturna og í gufubaði á sumrin. En sjarminn, sagan og staðsetningin var sterkari en kuldinn og hitinn.

Ég hjólaði og hjólaði útí úthverfi Sönderborgar, löðursveitt í lopapeysunni. Strunsaði inn í Dómshúsið í fýlu vegna flutninganna og leit í kringum mig. Hmmm skilti… bannað að borða ís, bannað að tala í farsíma, bannað að vera í háhæluðum skóm, bannað að bera vopn. Gekk rammskökk (ekki á hælunum) að informationen og rétti Réttarupplýsingagellunni pappírana mína og bað hana um að skella stimpli á þá. Gellan rak upp stór augu og bað mig um að útskýra afhverju… ég útskýrði. Hún vissi ekkert um hvað ég var að tala og vildi tala við vinnufélögu sína. Gékk hljóðlaust í burtu með nælu á vinstra brjóstinu sem á stóð „PRAKTIKANT“. Verður maður ekki að vera frekar klár og grimmur þegar maður vinnur í Dómshúsi??? Gellan kom til baka og bað mig um að setjast þarna á stólinn og bíða. Ég settist fyrir utan réttarsal nr 7. Shit, heldur fólk að ég sé gerandi, þolandi eða vitni? Reyndi að setja upp svipin „myndi aldrei gera neitt af mér“ og „læt sko ekki bjóða mér neitt“… Vitnasvipurinn „ahhh geisp, gvuð hvað ég er ekki að nenna þessu“ var líklega skásti kosturinn. Að kafna úr hita fór ég að virða fyrir mér involsið í húsinu… Fuck hver hannaði??? Fannst þetta hrikalega töff! ALLT SAMAN! Efnið, litirnir, lýsingin og puntið!

En þarna sat ég, fyrir utan sal 7, beið eftir að verða dregin fyrir rétt! En síðan var ég kölluð inn… ekki samt inní sal 7 heldur bara inní lítið skothelt herbergi. Konan var svakalega köld og nánast spurði „hvað viltu?“… hún tók sjálf ljósrit af minum orginal pappírum (ég hafði ljósritað allt) og byrjaði að stimpla. Stimplaði og stimplaði eins og hún ætti lífið að leysa. Sagði svo: „þetta kostar 400kr“, án þess að blikna. Ég: „hrhhr 400kr… gerði nú ráð fyrir að þetta kostaði… en 400kr???“ Kalda konan: „já, 100kr pr blað“. Ég: „okayyyy“. Kalda konan: „komdu fram og borgaðu“. Ég: „okay“

Ég gekk fram og var heitt fyrir… Gekk að informationen og þar beið önnur kona eftir mér með posa. Og ég með kortið hans Fúsa í Dómshúsinu í Sönderborg. Ég bað til Guðs: „góði Guð, leyfðu mér að renna kortinu sjálf í gegn… ekki sýna þessu ískalda kvennfólki að þetta sé nokkurnvegin stolið kort!“ Nei, þarna stóðu þær hlið við hlið og sögðu: „kortið takk“ (Í dk þarf maður svo sárasjaldan að láta kortið af hendi… eiginlega bara á pósthúsinu).

Nú nánast hataði ég íslensku ullina! Hvernig hafði mér dottið í hug að klæðast þessari flík í þessu veðri og í þessum aðstæðum.

Ég rétti henni kortið og hún stakk því í… ég stimplaði kóðann og hún tók kortið út og rétti mér… VÁ… þar skall hurð nærri hælum… Önnur fór með pappírana mína á bakvið og stimplaði meira, hin fór í símann og hringdi e-ð… heyrði hana segjast hafa tekið 400kr útaf korti og blalbalbal… heyrði ekki alveg hvað hún var að segja… svo beið hún í svoldla stund. Var hún virkilega að tjekka á kortinu í danskebank??? Hvert var hún að hringja? Ég sem hafði fengið púlsinn nokkurnvegin niður fyrir hættumörk! Síðan lagði hún á og hin konan kom með útstimplaða pappírana mína og sagði næstum bara: „hérna“.

Ég skjögraði út, meðvituð um hversu mjóu hefði munað að ég hefði verið færð í handjárn og beint yfir í Vestre Landsret!