Einn Ástarsögulæknir – MARGIR Ástarsögulæknar

Það er ekki nóg með að ég sé óvinsæl heima hjá mér. Í vinnunni er ég búin að koma mér í vandræði. Og skapa lélegan móral og uppþot á meðal læknanna þar sem allt var með kyrrum kjörum áður. Þar til Ástarsögulæknirinn fór í klippingu. Örfáum dögum seinna fer Doktor Typpalingur í klippingu. Hann fékk sér eins klippingu og Ástarsögulæknirinn. 

Ég spurði hann hvort þeir væru hjá sömu klippikonunni í Kaupmannahöfn (þeir búa þar báðir og fljúga á milli). Nei, það eru þeir ekki. Ég benti honum á að hann væri eins klipptur og hinn og notaði hans rétta nafn. Segðu mér, afhverju kallarðu hann ekki bara Ástarsögulækninn eins og þú ert vön? Hva´ einhver afbrýðissemi í gangi eða? Ekki beint, en finnst „Ástarsögulæknirinn ólíkt skemmtilegra viðurnefni heldur en Dr. Typpalingur.

Köllum Ástarsögulækninn bara Jens (en það er klárlega dulnefni). Allir læknarnir Þekkja viðurnefnið hans Jens nema Jens sjálfur. Og allir öfunda hann og halda að hann lifi spennandi hversdagsleika á deildinni eins og Ástarsögulæknarnir í Rauðu seríunum. 

En það er misskilningur. Þetta er einungis viðurnefni og allt með kyrrum kjörum. Enn hefur engin okkar þorað að ráðast á hann, fell´ann og narta í neðri vörina á honum.

En til að friða Dr. Typpaling, sagðist ég geta breytt viðurnefninu hans í „Skandinavíska ástarsögulækninn“ því það passar vel, hann er svo ljóshærður og bláeygður. Að auki gæti ég tekið mynd af honum. Ég væri nefnilega að læra á myndavélina og að ég væri akkúrat að æfa mig í að mynda fólk þessa dagana.

Hann vildi fá að vera í læknabúningnum því hann er frekar ungur. Ekki nema þrjátíu og tveggja. Óvenjulega ungur tilvonandi svæfingarlæknir.

En þegar hinir fréttu að ég hafði tekið mynd af Skandinavíska Ástarsögulækninum vildu þeir líka. Ég hafði því í nógu að snúast. Og var Guðslifandi fegin að fá svona fyrirsætur upp í hendurnar. Og fyrir mig skipti engu máli að þeir væru óvanir, ég er líka svoddan viðvaningur. Málið var bara að hafa gaman. En það var ekki nóg með að ég ætti að taka myndir. Þeir vildu allir fá að breyta viðurnöfnunum sínum. Vesen á þessum karlmönnum, endalaus dramatík.

Ég fór með „Pólska Ástarsögulæknirinn“ út undir vegg í nýja Skynfæragarðinum okkar. Yndislegur maður, ramm kaþólskur og hann hefur gefið mér 48 stykki Prince Polo. Þarna er hann að biðja fyrir mér, því ég bað hann um að fara úr fötunum.

Það var aftur á móti ekkert mál að láta „Þýska Ástarsögulækninn“ afklæðast. Hann vildi fara niður í búð og kaupa yfirvaraskegg og leðurhúfu en ég hafði engan tíma í slíka vitleysu. Við tókum myndina á bak við sófann sem við notum þegar við leggjum okkur á næturvöktunum. Auk þess fannst mér við hæfi að hann togaði í sjúkrahúsbrók. Ég veit þið trúið því ekki en hann er 51 árs. Ég sléttaði reyndar aðeins úr honum og vaxaði á honum bringuna þegar ég framkallaði myndina.

Þessi er frá Borgundarhólmi. Borgundarhólmski Ástarsögulæknirinn. Hvernig í ósköpunum á ég að valda þessum viðurnefnum? Þessi hefur verið hjá okkur í afleysingum og myndin er tekin á öðrum deginum hans á deildinni. Ég spurði hvort hann væri frá Noregi? Nei, frá Borgundarhólmi. Ó shit! Andskotinn! Sorrý Sorrý Sorrý, ég ætlaði sko að fara að hrósa þér fyrir dönskuna þína… Þetta er allt í lagi vinan, þú ert ekki sú fyrsta. Og takk.

Fyrir ykkur sem eruð ekki inn í dönsku landafræðinni og málýskunum hér, þá er Borgundarhólmur lítil dönsk eyja undan suðurströnd Svíþjóðar og með afar sérstæða mállýsku. Ég hef verið á Borgundarhólmi og átti í svolítlum vandræðum með að skilja innfædda sem töluðu 100% mállýsku.

Þessi læknir hefur búið í fjöldamörg ár í Kaupmannahöfn og talar því „venjulega“ dönsku með smá málýskuhreim. Gat alveg eins verið leifar af norsku.

Þetta var allavega mjög vandræðalegt fyrir mig, kommon, að halda að Dani sé ekki Dani…?

Þessvega er hann svona bitur á svipinn á myndinni. Hann neitaði að leggja eitthvað á sig, vildi ekki fara úr þessum teygða bol og hvað þá raka sig.

Síðan voru tveir Ungverjar að detta inn í húsið. Afar viðkunnalegir. Splunkunýjir og ferskir.

Þetta er hann Marcell. Hann tók þessar ullarbrók með sér. Ef hann skildi fara á skíði í Danmörku.

Og þetta er Zoltan. Hann er hrifin af gólfkylfum og því vildi hann mynd af sér á golfvelli. Þar lék lánið við mig að eiga íslenskan vin sem er margfaldur Danmerkurmeistari í golfi og sem gat því lóðsað mig á næsta völl. Á þessari mynd hefði ég átt að nota meira flass til að losna við skuggann á honum. Hann á skilið að vera uppljómaður.

Marcell og Zoltan eru keimlíkir og því fá þeir bara sama viðurnefnið: Ungverski Ástarsögulæknirinn og ég hlakka mjög mikið til að kenna þeim dönsku. Ætla að byrja á dónaorðunum til að skapa góða stemmingu.

Hin raunverulegi Ástarsögulæknir fékk enga mynd af sér þar sem honum er haldið fyrir utan allt þetta umstang. Hann lifir í þeirri góðu trú að hann sé bara venjulegur og virðulegur læknir. En trúið mér, hinir komast ekki með tærnar þar sem hann hefur hælana útlitslega séð. Langt í frá.

———————————————————————————————————

P.s. Þessi færsla var að miklu leyti haugalýgi, sérstaklega myndirnar, ég tók þær ekki sjálf heldur fékk þær allar lánaðar af netinu.