NAD

Póstmaðurinn minn dinglaði áðan, ég var alklædd og allt komið á sinn stað, og hann stóð móður og másandi fram á palli og sagði að pakkinn væri svo þungur að hann yrði að fara með hann inn í stofu…. jú jú mín vegna í keyinu. Svo riðaði hann með kassann inn í stofu og tautaði… “þyngdin skiptir máli!”

Ég gat nú ekki á mér setið (hvernig sem maður fer nú að því), enda orðin sátt við kaupin, og reif upp kassann og hvolfdi innihaldinu á stofuborðið. Og rétt var það, þyngslin eru töluverð, enda skiptir þyngdin máli.

Fjarstýringin er líka þung, en með mismunandi ljósum í tökkunum.

Og þar sem ég nú fyrrverandi (stoltur) Pioneer eigandi og mitt áhugamál á unglingsárunum lá í að aftengja og tengja græjurnar… inn út inn út inn út inn út… rogaðist ég með NADinn útá gólf og ákvað að tengja… Er almennt algjörlega ólæs á leiðbeiningar, svo ég byrjaði bara.

Vá þið ættuð að sjá allt “inn/út” dæmið aftan á!!! 89 ég er ekki að ljúga… 89 inn/út. Fjöldinn skiptir líklega líka máli. (Þar kemur skýringin á lauslæti íslenska kvenkynsins samkvæmt Tarantino og Se og Hör). En 89 —- ég er enn í sjokki.

Ég aftengdi gömlu hátalarana mína sem Fúsi er nýbúinn að sækja niðrí kjallara í mínu mótlæti.
Skellti þeim svo í þessa flottu hátalaramóttakara (held að það hafi allavega verið það rétta inn/út dæmi), sneri mér við og flækti mig í leiðslunum. Fuck, datt næstum, annar hátalarinn þeyttist í vestur en NADinn haggaðist bara örlítið, þarna kom sér sko vel að hafa þyngdina. Þarna skyldi ég fyrst tilganginn með þyngdinni. En ég lagaði bara hátalaratenginguna og reyndi svo að tengja ljósbleiku leiðsluna sem fylgdi með. Gat nú ekki séð hvar hú ætti að passa, stendur ekkert á henni eins og t.d. radio, dvd, karokee eða svona banalt e-ð. Og komst hvergi inn, sama hvernig ég reyndi að troða… það var líka e-ð annað stykki sem ég reyndi að tengja, vildi ekki tolla þrátt fyrir að ég lemdi á það.

En ég get svo svarið það… heimilið er að fyllast af leiðslum, ég ætti að krefjast þess að Fúsi smíðaði sætann rimlakassa utan um að þetta hengingardót.
En NADinn gat ég ekki tengt og verð ég líklega bara að bíða eftir að Fúsi kemur heim.