Vaski lesin pistillinn…og það virkar!
Alltaf þegar ég fer með Vask útfyrir lóðina, les ég honum pistilinn. Svona ósköp svipað og þegar ég las stelpunum pistilin í bílnum á leið í heimsóknir hérna í denn.
Það svínvirkaði alltaf… nema þegar þær kveiktu í húsinu hjá afa sínum og ömmu á Eiðum… eða brutu risastóru kristalsskálinu hennar Lellu föðursystur… eða þegar þær kveiktu í húsinu hjá afa sínum og ömmu í Fellabæ city eða þegar þær rifu ofninn af vegg, ásamt stykki úr veggnum hjá Reyni og Þrúði í Dybböl. Þær voru svoddan englar og hlýðnar með eindæmum.
Þegar ég les Vaski pistilinn segi ég: „Vaskur, þú mátt allsekki…“ og síðan eftirfarandi…
- gelta að fólki
- gelta að hundum
- gelta að hestum
- elta fólk
- elta skokkara
- elta hesta
- velta þér upp úr skít
- velta þér upp úr hræum
- éta hræ
- éta hálflifandi dýr
- æða útí drullupytta án míns leyfis
- hoppa upp á fólk sem vill heilsa þér
- hoppa upp á fólk sem vill ekki heilsa þér
- éta lifandi randaflugur (því ég veit ekki hvað ég á að gera ef þær stinga þig í hálsinn)
- láta krákurnar plata þig
- kúka beint fyrir framan röð af bílum sem bíða á rauðu ljósi
- æða áfram þannig að það koma hrygluhljóð úr þér
- æla af æsingi
- borða æluna
- leika skyndilegt heyrnarleysi
Vaskur virðist skilja hvert einasta orð…
Og svarar mér grafalvarlegur með augnaráðinu: „hey, ég skil, ég er reddý og verð eins og engill“
Síðan endurtek ég pistilinn í bílnum á leiðinni á ströndina eða í skóginn og Vaskur situr fallega í beltinu sínu og hlustar og skilur mig og fer síðan algjörlega eftir því sem ég hef sagt við hann… eins og stelpurnar þegar þær voru litlar.
Enda á ég engar myndir af honum geltandi að fólki né dýrum, étandi hræ eða haugdrullugum upp fyrir haus því þessir hlutir gerast ekki 🙂
